សៀមរាប៖ ឧបនាយករដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា លោកស្រី ម៉ែន សំអន បានលើកឡើងថាប្រាសាទអង្គរដែលឈរយ៉ាងរឹងមាំគឺបានបញ្ជាក់ពីការ តស៊ូ លះបង់ របស់បុព្វបុរសខ្មែរ ព្រះមហាក្សត្រគ្រប់ព្រះអង្គ ឥស្សរជនជាតិ អ្នកជំនាញការជាតិ និងអន្តរជាតិ ព្រមទាំងជនរួមជាតិគ្រប់ជំនាន់ ក្នុងការថែរក្សាការពារឱ្យនៅ គង់វង្សដល់កូនចៅរបស់ខ្លួន ហើយកូនខ្មែរបច្ចុប្បន្ននិងថ្ងៃអនាគតត្រូវតែចងចាំ និងប្តេជ្ញាចិត្តថែរក្សាការពារតំបន់អង្គរទាំងមូល ដើម្បីជាការតបស្នងសងគុណ។

ថ្លែងក្នុងពិធីបើកព្រឹត្តិការណ៍បុណ្យរំលឹកគុណអង្គរនៅមុខស្ពានហាលអង្គរវត្ត ខេត្តសៀមរាប នៅ ព្រឹកថ្ងៃទី១៤ ខែធ្នូ ឆ្នាំ២០២១នេះ លោកស្រី ម៉ែន សំអន បានថ្លែងថា ដើម្បីអបអរសាទរខួបគម្រប់២៩ឆ្នាំនៃការដាក់រមណីដ្ឋានអង្គរ រាជរដ្ឋាភិបាលបានសម្រេចរៀបចំពិធីរំលឹកគុណអង្គរឡើងដើម្បីជាការអបអរសាទរ ក៏ដូចជាបង្ហាញនូវការដឹងគុណចំពោះបុព្វបុរសខ្មែរ។

លោកស្រីបានលើកឡើងថា៖ «ការរៀបចំកម្មវិធីនេះប្រពឹត្តទៅ បានគឺ ក្រោមការដឹកនាំប្រកបដោយគតិបណ្ឌិតរបស់ សម្តេចតេជោនាយករដ្ឋមន្រ្តីបានដឹកនាំប្រទេសមានសុខសន្តិភាព និងឆ្ពោះទៅរកការអភិវឌ្ឍន៍លើគ្រប់វិស័យ ។ ម្យ៉ាងទៀតនៅ ក្នុងឆ្នាំនេះ គឺជាការអបអរសាទរនៃពិធីរំលឹកខួបគំរប់២៩ឆ្នាំ នៃការដាក់រមណីយដ្ឋានអង្គរ ចូលក្នុងបញ្ជីបេតិកភណ្ឌពិភពលោក នៃអង្គការយូណេស្កូផងដែរ»។

អាជ្ញាធរជាតិអប្សរាបានរៀបចំបុណ្យរំលឹកគុណអង្គរចាប់ពីថ្ងៃទី១៤ ដល់ថ្ងៃទី១៦ ខែធ្នូ ដើម្បីរម្លឹកដល់គុណបុព្វការីជន ដែលបានខិតខំកសាង និងថែរក្សារមណីយដ្ឋានអង្គរឱ្យបានគង់វង្សមកដល់សព្វថ្ងៃ។ បុណ្យនេះក៏មានព្រឹត្តិការណ៍ផ្សេងៗដែលនឹងរៀបចំកម្មវិធីសាសនានៅ ទីតាំងមុខប្រាសាទភ្នំបាក់ខែង កម្មវិធីសម្តែងនូវសិល្បៈស្បែកធំដោយក្រុមសិល្បៈវត្តរាជបូណ៌ ការសម្តែងល្ខោនបាសាក់ និងសិល្បៈជាច្រើនទម្រង់ទៀត។ ជាមួយគ្នានេះអាជ្ញាធរជាតិអប្សរា ក៏នឹងបើកឱកាសដល់សាធារណជនអាចទៅ ទស្សនកិច្ចឈ្វេងយល់អំពីការងារ នៅតាមការដ្ឋានជួសជុលប្រាសាទនានា ដែលអាជ្ញាធរជាតិអប្សរាកំពុងដំណើរការដែលអាចដឹងកាន់តែច្បាស់ពីកិច្ចការអភិរក្ស និងអភិវឌ្ឍរមណីយដ្ឋានអង្គរប្រកបដោយចីរភាព។

នេះជាលើកដំបូងហើយដែលអាជ្ញាធរជាតិអប្សរាបានរៀបចំព្រឹត្តិការណ៍រំលឹកគុណអង្គរ ហើយព្រឹត្តិការណ៍នេះនឹងក្លាយជាព្រឹត្តិការណ៍ប្រចាំឆ្នាំដែលនឹងប្រព្រឹត្តិទៅ១ឆ្នាំម្ដង។

អង្គរវត្ត មានទីតាំងស្ថិតនៅ ភាគខាងជើងនៃក្រុងសៀមរាប ក្នុងស្រុកសៀមរាប មានចម្ងាយ៧ គ.ម ពីទីរួមខេត្ត។ ត្រូវបានកសាងឡើងនៅសតវត្សទី១២ ដោយព្រះបាទសូរ្យវរ្ម័នទី២ ដែលជាស្នាដៃដ៏ធំចម្បងអស្ចារ្យនិងមានឈ្មោះល្បីល្បាញរន្ទឺសុះសាយ ទៅគ្រប់ទិសទីលើពិភពលោក។ រមណីយដ្ឋានអង្គរ ត្រូវបានចុះក្នុងបញ្ជីជាបេតិកភណ្ឌវប្បធម៌រូបីនៃពិភពលោក នៅក្នុងកិច្ចប្រជុំគណ:កម្មការបេតិកភណ្ឌពិភពលោកលើកទី១៦ ថ្ងៃទី១៤ ខែធ្នូ ឆ្នាំ១៩៩២ នៅទីក្រុងសាន់តាហ្វេ សហរដ្ឋអាមេរិក៕